Non fai moito había unha campaña de promoción do galego co lema "Fálalle Galego". Dende galizaelectronica aproveitamos o Día Das Letras Galegas para conmemorar e reinvindicar o uso do galego nos distintos ámbitos sociais, entre eles o musical.

Que Galiza pode estar na cima da música con identidade propia non é un soño. Foi unha realidade alá polos anos 80 do século XX, o cal demostra que a nosa terra pode apaixonar tanto a propios coma a foráneos. Daquelas o eixe Vigo - Madrid (cando aínda non había a autoestrada das Rías Baixas) foi unha vía musical innovadora e alternativa á escea dominante.

Restos daqueles tempos gloriosos aínda quedan na cidade olívica, como o actual Vademecum (daquelas chamado Ruralex) ou o Manco na rúa Lepanto, que conserva o seu nome e ten na persoa de Fernando Collazo, o seu DJ residente, un dos máximos exponentes daqueles tempos, e o mellor, dos actuais.

Aínda que a música non coñece de idiomas (tan bo pode ser un tema en inglés coma en castelán ou en galego), o feito é que o predominio do inglés no terreo da electrónica é sinxelamente abrumador. Non resulta fácil atopar temas electrónicos fóra do idioma "mundial." Fai anos non soamente o inglés dominaba a electrónica, senon tamén o pop e en xeral toda a música a nivel internacional. Con desenvolvemento do movemento latino e grazas a artistas que empezaron a despuntar cantando en castelán, o inglés perdeu ese dominio case absoluto... ata chagar a existir incluso uns Grammy latinos. 

Se é certo que resulta difícil atopar temas con letra en galego no ámbito electrónico, non podemos dicir o mesmo dos artistas e DJ's. Non hai máis que darse unha volta polo myspace e ir seguindo o fío dos amigos dalgún DJ que conozcades pa decatarse de que faltar, non faltan. Así pois, despois de todo, a situación non é tan mala como a primeira vista puidera parecer. Nas súas mans, e nas do resto dos artistas está en parte a clave da expansión do idioma nun ámbito que a primeira vista parece non "casar". Unha boa mostra de que si pode casar é que o que se escribe nesta web é galego made in Galiza, e ¡oh! falamos de música electrónica... así que tan incompatibles non deben ser ;-)

En canto á movida citada arriba, aquí se pode ler un bo artigo sobre o tema, aparte da entrada propia que ten na wikipedia.