"Propaganda (Part I)": así se chama o derradeiro álbum de estudio do holandés Marco V. Aínda que xa leva uns meses no mercado (saíu en maio), creo que merece a pena comentar e recomendarvos este disco imprescindible.

No seu cuarto álbum de estudio, tras tres anos de "silencio" (publicando pequenas obras mestras como Dudak e colaborando con xente como Sander Van Doorn), Marco Verkuylen vólvenos sorprender cun tremendo e innovador disco que consta de once temas que van dende o trance máis progresivo (Unprepared) ata o techtrance máis vanguardista (Coma Aid), pasando por tracks technohouse (Treviso).  Esta versatilidade volve a colocar os temas de Marco V nos playlists de xente como Sander Van Doorn, Marcel Woods, John O’Callaghan, Markus Schulz, Judge Jules ou Armin Van Buuren.

Marco V, do que moita xente di que a V ven de Visionary, ten un concepto moi especial dos albumes de estudio, e considera que son albumes de artista e como tales deben ser atractivos tanto para a vista como para o oído. Xa o fixera en 200V (que se ofrecía en CD/DVD cos visuais dos tracks incluídos, que eran os que pinchaba nas súas actuacións nunha perfecta combinación de visuais e tracks). Nesta ocasión contou coa colaboración do artista gráfico británico Vee Ladwa (que ten colaborado con Marvel, por exemplo, en cómics dos Catro Fantásticos), que lle fixo un pequeno cómic sobre o propio artista, "The V:Man History", para o libreto.

Aínda que todos os temas, o meu parecer, son exquisitos, caben salientar temas como Unprepared, un fantástico tema trance progresivo cun vocal masculino sumamente pegadizo e un sintetizador que nos lembra ó mellor Deadmau5. Igual de impactante é Chemicals, un auténtico hit techtrance que aínda que pode parecer do mesmo estilo dos temas que publica xente como Leon Bolier, ten un toque ácido que o fai realmente único. Ritual Purification tamén me gusta moito, cun sintetizador estilo Detroit, un tema capaz de crear un atmosfera ideal para calquera tipo de sesión. Digital Identity, do que destaca o sintetizador empregado (empregado en varios dos temas do álbum) con reminiscencias minimalistas, e en xeral os últimos tracks do álbum son Marco V en estado puro: unha base tech xunto con sintes exquisitos que tocan melodías repetitivas intercaladas con subidóns implacables salpicados de vocais e sons vanguardistas.

 Como curiosidade o último tema forma parte da banda sonora do campionato oficial de rallys da FIA (FIA WRC).

Tracklist:

1. Unprepared
2. Treviso
3. Solitary Confinement
4. Coma Aid (Remix)
5. Chemicals
6. The Man Who Was There
7. Ritual Purification
8. Digital Identity
9. A Journey Into Sound
10. Counterpoint
11. WRC Theme

Mentres agardamos a que, probablemente este mes, saia "Propaganda: Part II", podemos deleitarnos cun dos albumes de música electrónica máis importantes deste ano.